Ambasadori i Austrisë në Tiranë, z.Johhan Sattler, zhvilloi një leksion të hapur në UET, me temë “Austria, partneri i palëkundur i Shqipërisë nga pavarësia deri në pranimin në BE”.Moderuesi i takimit, Rektori i Universitetit Europian të Tiranës, Prof. Dr. Tonin Gjuraj, rikujtoi disa nga projektet bashkëpunuese mes UET-it dhe Universitetit të Salzburgut, por dhe atë mes dy vendeve. “Ka një bashkëpunim prej kohësh mes dy universiteteve dhe kemi një sërë projektesh që po vazhdojnë. Projekti Erasmus + na ka afruar shumë, por edhe projekte të tjera”, tha Gjuraj.
Ndërkohë që shkëlqesia e tij u ndal fillmisht për të shpjeguar se cilat janë detyrat e tij si ambasador i Austrisë në Shqipëri, ku më kryesorja është mbështetja për integrimin e Shqipërisë për në BE. “Detyra ime si një ambasador është dhe të ndihmoj Shqipërinë me përgatitjet për t’u bërë pjesë e BE-së” u shpreh ai.
Në fjalën e tij ai përmendi rolin qe luajnë bizneset austriake në Shqipëri, të cilat operojnë prej vitesh, por dhe si duhet të jetë një diplomat.
“Një diplomat duhet të jetë i sjellshëm dhe shumë i duruar, për të arritur rezultatet që kërkon”, u shpreh zoti Sattler.
Ai gjithashtu përmendi një sërë datash historike, për të treguar që lidhja e Austrisë me Shqipërinë është shumëvjeçare, duke treguar qe konsulenti i parë austriak ka ardhur në atë që quhet sot Shqipëri, në shekullin e 18-të.
Leksioni u ndoq me shumë interes nga studentë dhe pedagogë të UET-it dhe u finalizua me një sesion pyetjesh nga studentët për ambasadorin austriak.