“Sandwich”, libri më i fundit i gazetarit dhe publicistit Mustafa Nano, botuar nga Uet Press, u bë subjekti i një bisede të hapur në qendër të Tiranës.
E zhvilluar në ambjentet e Instalacionit “Reja”, biseda u zhdërrua në një debat midis historianëve dhe publicistëve. Autori shkëmbeu batuta dhe komente me Prof. Xhevat Lloshin, Prof. Nevila Nika, Prof. Hysamedin Feraj dhe botuesin Henri Çili.
Në libër trajtohen teza e nacionalizmit shqiptar dhe raportet me fqinjët në të gjitha kohërat dhe, jo pa qëllim, autori ka zgjedhur një titull libertin dhe provokativ, “Sandwich”.
Gjatë bisedës u trajtuan probleme të debatueshme të historisë, gjuhës e kulturës shqiptare. Por dilema shekspirane që mban nëntitulli i librit, “a është mirë me qenë shqiptar?” duket se do të nxisë ende debat.