Ministria e Arsimit dhe Sporteve nëpërmjet udhëzimit të ri. nr.53, u ka dhënë mundësinë studentëve të dy cikleve të studimit që të regjistrohen në Universitetet private
Të gjithë ata studentë që për arsye të ndryshme nuk kanë arritur të regjistrohen në studimet e Ciklit të parë dhe Ciklit të Dytë u jepen dhe disa ditë afat për ta bërë të mundur këtë, përkatësisht deri më 21 dhjetor për studentët e Bachelor dhe Master. Udhëzimi i ri i ministrisë vlen vetëm për Institucionet e Arsimit të Lartë privat.
Me anë të një udhëzimi që mban datën 16 dhjetor 2015 Ministria e Arsimit dhe Sporteve shtyn afatin e regjistrimi në këto universitete deri më datën 21 dhjetor 2015 duke ndryshuar afatet e mëparshme të regjistrimeve dhe trasnferimeve, që ishin data 23 tetor 2015 për ciklin Bachelor dhe 13 Nëntor 2015 për ciklin Master.
Sipas këtij udhëzimi IAL-të private mund të regjistrojnë studentë deri në këtë datë ndërkohë që kanë mundësinë që të dorëzojnë pranë AKP-së listën e studentëve të regjistruar dhe dokumentacionet përkatëse deri më datën 28 dhjetor, ndërsa sipas afateve të reja AKP-ja duhet të dërgojë tek këto universitete listën me numrat e matrikulimit për çdo student deri në datat 28 janar 2016.
Më tej udhëzimi nr. 53 ndryshon dhe afatet e përcaktuara në pikën 6 të udhëzimit të mëparshëm nr.37 duke shtyrë afatin e dorëzimit të të dhënave zyrtare mbi regjistrimet dhe transferimet e studentëve në programet e ciklit të parë dhe të dytë pranë Ministrisë së Arsimit deri më datën 1 shkurt 2015.
Për zbatimin e këtij udhëzimi ministria ka ngarkuar Drejtorinë e Arsimit të Lartë dhe të Shkencës në MAS dhe Agjencinë Kombëtare të Provimeve, si dhe institucionet private të Arsimit të Lartë në vend.